Восень па традыцыі запамінаецца нам агульным святам — Днём пажылых людзей.
У Дзёрнавіцкім СДК адбыўся вечар, прысвечаны гэтай падзеі. Цікавую і змястоўную праграму прапанавалі прысутным работнікі культуры Вольга Уладзіміраўна Маева і Тамара Міхайлаўна Маліноўская. Прагучалі віншаванні, былі ўручаны сувеніры юбілярам. Асобна адзначаны «ізумрудныя» юбіляры, сям’я Тамары Віктараўны і Аляксандра Іванавіча Кротавых з вёскі Дзёрнавічы, якія пражылі ў згодзе 55 год. Прысутным вельмі спадабаліся прыпеўкі ў выкананні пенсіянеркі Надзеі Сямёнаўны Казачонак, старадаўнія песні Лідзіі Піліпаўны Зуевай і Галіны Сяргееўны Камаровай. Былі арганізаваны розныя конкурсныя праграмы, парадаваў стол з салодкім пачастункам.Для кожнага з прысутных знайшліся добрыя, цёплыя словы. Доўга свяціліся вокны сельскага Дома культуры. Людзі спявалі, танцавалі, не хацелася разыходзіцца. За арганізаванае мерапрыемства пенсіянеры ўдзячны работнікам Дзёрнавіцкага СДК, а таксама дырэктару КУВСП «Лявонішана» А. С. Калмычэўскаму, які, нягледзячы на занятасць, удзяляе гэтай катэгорыі насельніцтва вялікую ўвагу.
З. ГРАЧОВА, старэйшына в. Дзёрнавічы.
