Вучаніца ДУА «Верхнядзвінская гімназія імя І.А. Макеенка» Юлія Голубева выйшла ў фінал рэспубліканскага конкурсу юных чытальнікаў «Жывая класіка» і заняла другое месца ва ўзроставай катэгорыі VII-VIII класы.
Сумесны праект тэлекампаніі СТВ і Міністэрства інфармацыі Рэспублікі Беларусь – творчы конкурс чытальнікаў нацыянальнай паэзіі «Жывая класіка» штогод выяўляе таленавітую моладзь. Сёлета ён быў прысвечаны Году міра і стварэння.
Пасля яркіх выступленняў усіх 17-ці ўдзельнікаў рэспуб-ліканскага конкурсу прафесійнае журы размеркавала паміж імі прызавыя месцы. Наша зямлячка Юлія Голубева заняла другое месца ў сваёй узроставай катэгорыі.
– Падрыхтоўка да конкурсу была вельмі грунтоўная, – расказвае пераможца. – Займаюся ў аб’яднанні «Мастацтва жывога слова», створаным на базе бібліятэкі гімназіі. Ім кіруе таленавіты майстар слова Тамара Міхайлаўна Рыжая, якая падрыхтавала нямала «зорачак» – чытальнікаў нацыянальная паэзіі. Мы абралі верш Янкі Купалы «Жняя» і вырашылі абыграць яго песняй. Пачалася карпатлівая работа. Спачатку рэпеціравалі голас, інтанацыю, рухі і, канешне, саму песню. Вельмі дапамагло тое, што займаюся таксама ў эстраднай студыі «Жаваранкі» пры РЦКіНТ. Так атрымаўся цікавы і незвычайны нумар, сапраўдны міні-спектакль. Спачатку прэзентавалі яго на раённым этапе, затым – абласным, дзе заняла першае месца. Але за выхад у фінал прыйшлося пазмагацца. У Мінску прайшоў адбор сярод пераможцаў абласнога этапу, але я прайшла ў фінал.
Удзячна ўсім, хто дапамог перамагчы. У першую чаргу, кіраўніку Тамары Рыжай за тое, што паверыла ў мяне і займалася пастаноўкай нумара; работнікам Цэнтра культуры Кацярыне Руткоўскай, Ірыне Хадорчанка, Іне Федарэнка, Таццяне Трыфаненкавай, якія запісалі фанаграму, рэпеціравалі песню, выбралі народны касцюм. Відэа-візітку з прыгожымі краявідамі Вернядзвіншчыны і самапрэзентацыяй зняў і зманціраваў Сяргей Тамашэвіч. І, канешне, маёй галоўнай суддзі і слухачу маме Вользе, якая суправаджала і падтрымлівала на ўсіх этапах конкурсу.
– З кожным годам адзначаецца больш пільны падыход да выбару твораў. Па ўмовах конкурсу, паэтычныя радкі, а таксама проза, павінны быць на беларускай мове, – гаворыць Тамара Рыжая. – Для выканання абралі класіка беларускай літаратуры Янку Купалу. «Жняя» напоўнена глыбокім сэнсам, любоўю да Радзімы, зямлі, чалавека працы, жанчыны.
Ксенія ТАМАШЭВІЧ.
