Заўтра ў аграгарадку Лявонішана пройдзе раённы конкурс «Уладар сяла-2015»

Заўтра, 22 жніўня, у аграгарадку Лявонішана адбудзецца раённы этап рэспубліканскага конкурсу «Уладар сяла-2015».
У праграме — прадстаўленне маладых сем’яў, эстафеты, спаборніцтвы ў розных відах, кулінарны конкурс, творчыя выставы.
Пачатак у 10 гадзін.
У аўторак, 25 жніўня, у Верхнядзвінскім РДК адбудзецца абласны этап конкурсу.
Пачатак у 11 гадзін.
Запрашаем на цікавыя мерапрыемствы!

Прадстаўляем удзельнікаў раённага конкурсу «Уладар сяла»:

Сям’я Заталокіных з аграгарадка Асвея. Дзмітрый і Вераніка, а таксама іх дзеткі Анастасія і Даніла прымаюць удзел у раённым свяце не першы раз.
Дзмітрый родам з вёскі Відокі, працуе вадзіцелем у сельгаспрадпрыемстве “Асвейскі”. Вераніка з Расіі, з Волгі. Зараз – хатняя гаспадыня.
Каля іх хаты шмат кветак, дагледжаны агарод. У вальеры жыве вялікі сабака па мянушцы Бэт.
Кола абавязкаў Веранікі: дзеці, дом, агарод, кветкі, гатаванне ежы. Яна здала на правы і цяпер лічыць сябе самай шчаслівай жанчынай на свеце.
Дзіма – на ўсе рукі майстар. Усё можа зрабіць, усім дапамагае. Нават у сне думае пра сям’ю і пра тое, што не зрабіў учора. Смачна гатуе пельмені. Кожны год, дзякуючы залатым рукам Дзімы, у двары з’яўляецца то новая прыгожая альтанка, то замест пуні — лазня, а ў гэтым годзе яшчэ і новы гараж. Каля дома ёсць арэлі, басейн, які, пакуль Даня быў маленькім, выконваў ролю манежа. На стале ў альтанцы гасцей чакае пузаты самавар, духмяная гарбата і мёд.
Дачушцы 8 гадоў. Яна пойдзе ў трэці клас Асвейскай сярэдняй школы. Насці вельмі падабаецца чытаць, пісаць, маляваць, лічыць. Любіць і танцаваць, але спяваць — больш. Гуляе разам з малодшым братам, дапамагае матулі па гаспадарцы.
Даніку год і 10 месяцаў. Яму ўсё падабаецца, у яго ўсё добра. Вельмі вясёлы хлопчык.
У вольны час сям’я Заталокіных адпачывае на ўлонні прыроды.

Сям’я Салавых з аграгарадка Валынцы. Яе прадстаўляюць Таццяна і Руслан, іх дзеці Даша (11 год), Мікіта (7 год) і Марат (2 гады). Пазнаёміліся будучыя тата і мама на дыскатэцы ў Галубаўскім клубе. Руслан прапанаваў сябраваць, але Таццяна адмовілася. “Усё роўна калі-небудзь будзеш маёй,” — на развітанне сказаў хлопец. Так і атрымалася. Праз 7 год на свяце ў тым самым Галубаўскім клубе лёс ізноў звязаў іх. І, як яны сцвярджаюць, – назаўсёды.
Руслан працуе на Валынецкім вытворчым участку Верхнядзвінскага ДРУВП ЖКГ. Таццяна зараз у дэкрэтным водпуску, а дагэтуль працавала дыспетчарам у ААТ “Антонава-Агра”. Гаспадарка прадаставіла сям’і чатырохпакаёвую квратэру на другім паверсе. Але гэта не перашкаджае ім разводзіць курэй, вырошчваць садавіну і гародніну, а таксама кветкі. Гаспадыня сцвярджае, што без агарода – анікуды. Ёсць і цяпліца, у садзе спеюць грушы, слівы, яблыкі, ягады.
Захапленні ў членаў сям’і разнастайныя. Гаспадыня любіць вязаць. Бацька разводзіць хатнюю птушку. Дачушка Даша займаецца бісерапляценнем, авалодвае фартэпіяна, у гэтым годзе заняла другое месца на конкурсе “Галасы будучага”. Сын Мікіта робіць цудоўныя рэчы з салёнага цеста. А малодшанькі Марат больш за ўсё любіць глядзець мультфільм пра Машу і Мядзведзя, расце будучым памочнікам мамы і таты.
Разам сям’я Салавых любіць адпачываць у сваім садзе з шашлыком ці на рэчцы.

Сям’я Цвяцінскіх з аграгарадка Лявонішана. Разам ужо 3 гады. Маці Святлана, бацька Арцём і дачушка Насценька, якую на здымку тата забірае з раддому, а зараз ёй 1,5 года. Арцём і Святлана працуюць у сельгаспрадпрыемстве “Лявонішана”. Таццяна — заатэхнік, а Арцём — галоўны інжынер.
У дзяцінстве заканчвалі Галубаўскую школу. Далей яна вучылася ў Лужасна, а ён — у Лепелі. Пасля вучобы ажаніліся і сталі працаваць у ААТ “Сакалоўшчына”. Праз год перабраліся ў сельгаспрадпрыемства “Лявонішана”. Тут ім і кватэру прадаставілі. Каля дома ёсць цяпліца, невялічкі агарод, кветкі і… два кацяняці.
На сядзібе шчыруюць разам: яна займаецца агародам, ён – косіць траву, выконвае ўсю “мужчынскую” работу. Насценька вельмі любіць ляпіць і маляваць. Усе разам “хварэюць” за беларускіх біятланістаў.

Сям’я Размысловіч з аграгарадка Нурава. У яе складзе — тата Раман, мама Юлія, дачушка Вольга і сынок Ягор. Юля мясцовая дзяўчына, а Раман з Полацкага раёна. Вучыліся ў адным класе Нураўскай школы, пасля ў Боркавіцкім ліцэі. Дом атрымалі ад гаспадаркі. Пакуль там ідзе капітальны рамонт, Размысловічы жывуць з бацькамі. У гаспадарцы ёсць карова, бык, куры, свінні і два каты. А таксама агарод і кветнікі.
Дачушцы Волюшцы, як яе ласкава называе тата, два з паловай гады. Яна любіць складаць мазаіку, маляваць, танцаваць. А больш за ўсё – гуляць з тэлефонам. Ягорку ж толькі 5 месяцаў. Ён проста вясёлы хлопчык. Бацька займаецца тэхнікай, маці – дзецьмі. А ўсе разам — проста дружная, добрая сям’я.
* * *
Усе названыя сем’і прымуць удзел у раённым конкурсе «Уладар сяла-2015», які пройдзе заўтра ў аграгарадку Лявонішана, і прадэманструюць свае таленты, спрыт і знаходлівасць. Пажадаем ім удачы!