15 верасня мы адзначалі дзевяцігоддзе Дня бібліятэк. Аб важнасці для грамадства, жыхароў нашага раёна гэтых устаноў культуры, буднях іх работнікаў расказвае дырэктар цэнтралізаванай бібліятэчнай сістэмы Ала Канстанцінаўна ГЕНДЗІК.
-У нашым раёне 26 бібліятэк прапаноўваюць свае паслугі насельніцтву. Аддаленыя населеныя пункты абслугоўвае бібліобус. Штогод бібліятэкі наведваюць звыш 13 тысяч чытачоў, ім выдадзена больш за 262 тыс. экземпляраў выданняў.
У бібліятэк шмат напрамкаў дзейнасці: выхаваўчая, інфармацыйная, арганізацыя вольнага часу насельніцтва.
У сістэме працуюць 9 клубаў па інтарэсах, з іх 2 носяць званне «народны», і 10 гурткоў, якія наведваюць 241 чалавек. Аб іх і хацелася б расказаць падрабязней.
Аматарскія аб’яднанні і гурткі маюць разнастайныя накірункі: літаратурны, літаратурна-музычны, краязнаўчы, экалагічны, прыкладнога характару.
Клубы па інтарэсах аператыўна адклікаюцца на патрабаванні часу, даюць магчымасць аб’яднаць чытанне і творчую дзейнасць іх удзельнікаў. Народны клуб «Сучаснік» існуе больш 17 год пры цэнтральнай раённай бібліятэцы. У яго складзе — неардынарныя творчыя людзі розных узростаў, прафесій, інтарэсаў і поглядаў. Дэвіз клуба «Усё аддаў — і скарб набыў, што для сябе збярог — згубіў».
Асноўны напрамак дзейнасці — прапаганда кнігі і краязнаўства. Формы правядзення масавых мерапрыемстваў разнастайныя: вечарыны-сустрэчы, вечарыны-партрэты, тэматычныя вечарыны, літаратурныя гадзіны, краязнаўчыя вандроўкі.
Члены аматарскага аб’яднання друкуюцца на старонках нашай «раёнкі», здымаюць відэафільмы аб родным краі.
Сумесна з супрацоўнікамі ЦБС выдадзена 11 зборнікаў вершаў удзельнікаў клуба. Апошнія з іх — зборнік «Верхнядзвінскі паўстанак» Ч. Петрашкевіч і «Между светом и тенью» — А. Мядзюты.
Вельмі цікава прайшло пасяджэнне клуба, прысвечанае жыццёваму і творчаму шляху мастака І. Хруцкага «Мастер натюрморта и портрета». Яркае, незабыўнае ўражанне ў прысутных выклікала выступленне загадчыцы мастацкага аддзялення школы мастацтваў Вольгі Нікалаевай, якое суправаджалася дэманстрацыяй слайдаў. Працягам мера-прыемства стала наведванне выставы эцюдаў праўнучкі І. Хруцкага Я. Маціеўскай у г. Полацку.
Народны клуб «Белыя вароны» пры Каханавіцкай бібліятэцы — гэта і маржаванне, і веласпорт, і прапаганда здаровага ладу жыцця, і вывучэнне роднага краю, і патрыятычнае выхаванне, і эстэтычнае. Праведзена шмат гутарак, лекцый аб мастацтве, створана багатая відэятэка, ёсць свой музей. І ўсё гэта дзякуючы кіраўніку клуба П. П. Квяцінскаму, сапраўды апантанаму чалавеку.
Пры Бігосаўскай і Боркавіцкай бібліятэках працуюць клубы для жанчын «Сябровачка». Тэмы пасяджэнняў яны вызначаюць самі і прыемна вабяць час за кубкам гарбаты.
«Архідэя»… Ужо шмат гадоў гэтая экзатычная кветка цвіце ў Дзёрнавічах. Кіраўнік клуба Д. П. Вароніч — біёлаг па спецыяльнасці, вельмі цікава ладзіць пасяджэнні, на якіх можна пачуць шмат новага пра кветкі. Гэта не толькі фларыстыка, а і лекі, і кулінарыя, і ўсялякія прысмакі, і кветкі-абярэгі.
Члены клуба «Аптыміст» (Валынцы) захапляюцца краязнаўствам і вышыванкамі, ад рука-дзелля яго членаў вачэй не адвесці. Клуб пастаянна ўдзельнічае ў раённых конкурсах і атрымлівае ўзнагароды.
Шмат добрых спраў на рахунку літаратурнай гасцёўні Асвей-скай бібліятэкі, дзіцячых гурткоў «Экоша» (дзіцячая бібліятэка), «Спадчына» (Прудзінкі), «Чамучкі» (Шайцерава), «Рукадзельніца» (Лявонішана). Для дзяцей работнікі бібліятэк ладзяць выставы-прагляды, гульні-падарожжы, інсцэніроўкі казак.
Пры бібліятэках-клубах плённа працуюць вакальныя групы: жаночая — у Чыстаполлі, мужчынская — у Сакалоўшчыне, дзіцячая — у Жыгулях.
Як паказвае час, аб’яднанні пры бібліятэках — дзейсная форма далучэння чытачоў да багатай духоўнай культуры. Шчыра віншую бібліятэкараў, усіх сяброў кнігі са святам, жадаю моцнага здароўя, творчых поспехаў.
16/09/2010
Калісьці ў гэтую бібліятэку бегаў і я. Але беларускіх кніг нажаль там вельмі мала!