Адыход ад перакрыжаванага субсідзіравання дасць магчымасць знізіць тарыфы на электрычнасць для рэальнага сектара беларускай эканомікі. Аб гэтым паведаміў 31 кастрычніка першы віцэ-прэм’ер Уладзімір Сямашка на сумесным пасяджэнні Палаты прадстаўнікоў і Савета Рэспублікі Нацыянальнага сходу Беларусі, адказваючы на пытанне сенатара Уладзіміра Паўлюкевіча.
«Калі б сёння за адзін раз можна было ліквідаваць перакрыжаванае субсідзіраванне па электраэнергіі, цяпле і газе, то можна было б знайсці 4,4 цэнта зніжэння кошту электраэнергіі для рэальнага сектара эканомікі», — сказаў першы віцэ-прэм’ер.
Уладзімір Сямашка адзначыў, што гэта сацыяльна-палітычнае пытанне, таму ў Беларусі плаўна і без перагібаў, па меры росту зарплаты і агульнага ўзроўню дабрабыту будзе ліквідавацца перакрыжаванае субсідзіраванне. Гэта плануецца завяршыць да 2017 года. «І вось тое, што мы атрымаем адтуль, аддадзім рэальнаму сектару», — адзначыў ён. Акрамя таго, першы намеснік прэм’ер-міністра сказаў, што вырашана з 1 студзеня 2015 года знізіць цану на электраэнергію для рэальнага сектара з 12,93 цэнта да 12,45 цэнта. Пры гэтым ён адзначыў, што за апошнія тры гады ў Беларусі наогул амаль не павышаліся тарыфы для рэальнага сектара эканомікі. Што датычыцца насельніцтва, не так даўно яно аплачвала 28-30 працэнтаў ад рэальнай цаны электрычнасці, а цяпер плаціць 81,9 працэнта. Але пры гэтым за цяпло людзі плацяць толькі 22,8 працэнта, гэта значыць менш за чацвёртую частку ад сабекошту гігакалорыі.