У Верхнядзвінскай цэнтралізаванай бібліятэчнай сістэме стартаваў агляд-конкурс на лепшае масавае мерапрыемства. Мэта конкурсу — павышэнне прэстыжу бібліятэк, бібліятэчнай прафесіі і паляпшэнне якасці мерапрыемстваў.
Аднымі з першых на суд журы прадставілі свае мерапрыемствы бібліятэкары Антонаўскай бібліятэкі — гістарычную гадзіну «Валынецкае гета» і Шайцераўскай — літаратурна-музычную кампазіцыю «Подзвігу салдата пакланіся», прысвечаную 70-годдзю вызвалення Беларусі ад нямецка-фашысцкіх захопнікаў. На мерапрыемства ў Шайцераўскі СДК нас запрасіла мясцовы бібліятэкар Зінаіда Міхайлаўна Рудкоўская. Збор матэрыялаў і напісанне сценарыя цалкам ляглі на яе плечы. У падрыхтоўцы і правядзенні мерапрыемства дапамагалі настаўнікі і вучні Шайцераўскай школы, работнікі мясцовага СДК.
Дзеці распавядалі аб падзеях Вялікай Айчыннай вайны, наступствах вайны ў нашым раёне, трагічным лёсе людзей у ваенны час. Трэба адзначыць высокі ўзровень чытальніцкага майстэрства вучняў. Вядучымі мерапрыемства былі настаўнік С. Г. Крэпачова і бібліятэкар школьнай бібліятэкі Г. У. Гмір. Культработнікі А. Пашкевіч і І. Булаўская выканалі песні аб вайне. Гледачам была прадстаўлена мультымедыйная прэзентацыя, падрыхтаваная сумеснымі намаганнямі З. М. Рудкоўскай і настаўніка інфарматыкі І. Ю. Бяляевай.
Конкурс доўжыцца да лістапада. Будзем чакаць ад нашых бібліятэчных работнікаў новых творчых задумак.
Т. Зуева,
метадыст раённай бібліятэкі.
