Верхнядзвіншчына славіцца сваімі лясамі. Ды і як можна не захапляцца велічнымі барамі, таямнічым шэптам лісця ў бярозавых гаях, рознаквеццем асенніх клёнаў!
Але ўсё гэта хараство — не толькі дарунак для душэўнай асалоды, але і крыніца драўніны, грыбоў і ягад, лекавай сыравіны. І яшчэ лес — дом братоў нашых меншых.
Аб тым, каб насельнікі зялёнага царства адчувалі сябе камфортна і адначасова адпавядалі інтарэсам эканомікі, клапоцяцца работнікі лясной гаспадаркі.
-Колькасць большасці дзікіх жывёлін знаходзіцца ў аптымальных межах, — гаворыць інжынер па паляўнічай гаспадарцы ДЛГУ «Верхнядзвінскі лясгас» М. П. Савіцкі. — Па апошняму «перапісу» ласёў налічваецца 730 галоў, касуль 930, мноства кабаноў. Штатныя егеры пільна сочаць за сваімі падапечнымі. У зімовы час клапоцяцца аб іх рацыёне: падсыпаюць зерне, нарыхтоўваюць венікі, якімі ласуюцца касулі, а для ласёў падсякаюць асіны.
-Каго з егераў Вы хацелі б адзначыць?
-Выключнай стараннасцю вызначаецца В. Р. Пятровіч. Яго «уладанні» — Ігналіна і наваколле. Валерый Рыгоравіч ніколі не лічыцца з асабістым часам, выдатна валодае абстаноўкай.
У Бігосаўскай зоне парадак забяспечвае Антон Савельевіч Мархель, у Сар’янскай — Сяргей Паўлавіч Кавалеўскі.
-У абавязкі егераў уваходзіць і арганізацыя здабычы дзікіх жывёлін…
-А як жа. Трэба так наладзіць паляванне, каб не здаралася эксцэсаў. Таму ўсе, хто мае пуцёўку на адстрэл, праходзяць падрабязны інструктаж. У лесе егеры вызначаюць пазіцыі для стралкоў, пільна сочаць за дысцыплінай.
Дарэчы, у паляўнічай гаспадарцы лясгаса загоннае і індывідуальнае паляванне на лася, касулю, кабана дазволена з 1 кастрычніка па 30 снежня па пятніцах, суботах і нядзелях, панядзелках, а таксама ў святочныя дні і дзяржаўныя святы.
-Колькі ж каштуе «задавальненне» заваліць звера?
-Разавы дазвол і паляўнічая пуцёўка на лася-сегалетка — 2 млн рублёў, на дарослага — 5 мільёнаў. А вось трафейныя асобіны ацэньваюцца даражэй. Калі рогі маюць 4-5 сукоў — 7 млн рублёў, 6 і больш сукоў — 15 мільёнаў.
Касуля — ад 200 да 700 тысяч рублёў, кабан — ад 150 тысяч за сегалетка да 600 тысяч за трафейнага (у залежнасці ад памеру клыкоў).
-Аб кабанах размова асобная. За апошні час яны сталі сапраўднай напасцю для агароднікаў, шкоднічаюць і на грамадскіх пасевах. Ды гэта яшчэ паўбяды. А вось у якасці распаўсюджвальнікаў афрыканскай чумы кабаны ўяляюць сабой сур’ёзную пагрозу для сельскагаспадарчых арганізацый і ўласных падвор’яў грамадзян.
Напрыклад, кіраўніцтва і спецыялісты ААТ «Шайцерава», дзе размешчаны буйны свінагадоўчы комплекс, зрабілі ўсё магчымае, каб небяспечная інфекцыя не трапіла на яго тэрыторыю. Але пагрозу з боку хворых дзікоў яны прадухіліць не ў стане. Выходзіць, выйсце адно — адстрэл?
-Так, і ліміты на знішчэннне кабаноў павялічаны. Свой ліміт — 20 жывёлін — паляўнічыя лясгаса ўжо асвоілі, дадатковае заданне — яшчэ 13 галоў. Выканаем і яго, як толькі будзе завершана ўборка кукурузы. Дзікі настолькі прывыклі да спакойнага існавання, што суткамі не пакідаюць «свае кармавыя ўгоддзі». А паспрабуй адшукаць хітрага звера на неабсяжнай кукурузнай плантацыі!
Дарэчы, планы па адстрэлу кабаноў даведзены і таварыству паляўнічых і рыбаловаў (350 галоў) і «Інтэрсервісу» (120 галоў).
У заключэнне хачу пажадаць паляўнічым удачы пры строгім захаванні ўстаноўленых правілаў. Галоўнае, націскайце на курок толькі тады, калі выразна бачыце цэль.
М. КАТКОЎ.
