Багацці прыроды не бязмежныя

Наша прырода багатая сваімі лясамі, рэкамі, азёрамі. А ў лясах — дзічына, грыбы і ягады, у вадаёмах — шмат рыбы і вадаплаўных птушак, нярэдка сустракаюцца бабры і андатры.

Ды ўсё гэтае багацце небязмежнае, калі адносіцца да яго па-драпежніцку, улічваючы толькі ўласныя інтарэсы. Некаторыя грамадзяне пагарджаюць усімі правіламі палявання і рыбнай лоўлі.
А вынікі бываюць для іх сумнымі. Так, у мінулым месяцы судом Расонскага раёна (напомнім, што яго тэрыторыя кантралюецца нашай інспекцыяй) была разгледжана крымінальная справа ў адносінах да двух жыхароў г. п. Расоны і аднаго жыхара вёскі Альбрэхтава, якія незаконна лавілі сеткамі рыбу на возеры Няшчэдра. Яны сумесна здабылі 103 асобіны розных відаў рыбы агульнай вагой 51 кілаграм, чым нанеслі навакольнаму асяроддзю шкоду ў асабліва буйным памеры — на суму 6 482 000 рублі. Ім прызначана пакаранне ў выглядзе пазбаўлення волі тэрмінам на два гады з двухгадовай адтэрміноўкай.
На тым жа возеры затрыманы за браканьерства два жыхары г. Полацка. У сеткі трапілі 60 рыбін, шкода ацэнена ў 2 947 000 рублёў. Суд аштрафаваў кожнага з іх на суму 1 925 000 рублёў.
Ул. ГАНЧАРОНАК,
дзяржінспектар Верхнядзвінскай міжраённай інспекцыі аховы жывёльнага і расліннага свету.
* * *
Просім грамадзян паведамляць аб фактах браканьерства па адрасу: вул. Савецкая, 193/2 або па тэлефоне «гарачай лініі» 5-73-13.