Плённым стаў сёлетні сельскагаспадарчы год для верхнядзвінскіх хлебаробаў. Нягледзячы на складаныя ўмовы надвор’я, атрыманы добрыя ўраджаі збожжа, рапсу, іншых культур, дасягнуты дастойныя паказчыкі па вытворчасці малака і мяса.
У абласным спаборніцтве Верхнядзвінскі раён заняў першае месца на ўборцы ўраджаю зерневых і зернебабовых культур сярод раёнаў другой групы. У намінацыі «Сярод аграпрамысловых аб’яднанняў на ўборцы ўраджаю зерневых і зернебабовых культур» першае месца заваявала ААТ «Верхнядзвінскі масласырзавод». Сярод сельскагаспадарчых арганізацый першай групы на ўборцы збожжа другое месца ў ААТ «Шайцерава».
Першыя месцы ў сваіх намінацыях занялі старшы камбайнер ААТ «Шайцерава» Дзяніс Ясюкевіч і трактарыст-машыніст ААТ «Верхнядзвінскі масласырзавод» Арцём Цвяцінскі. Адзначана плённая праца на жніве шэрагу іншых гаспадарак і асобных работнікаў.
У сувязі з эпідэміялагічнай сітуацыяй сёлета не будзе традыцыйнага маштабнага раённага святкавання. Але працаўнікі вёскі атрымаюць шматлікія віншаванні ад удзячных землякоў за іх нялёгкую, добрасумленную і такую патрэбную ўсім нам працу.
