Механізатар ААТ “Верхнядзвінскі масласырзавод” Арцём Цвяцінскі заняў першае месца ў вобласці сярод трактарыстаў-машыністаў, занятых на нарыхтоўцы травяных кармоў на камбінаваных рулонных прэс-падборшчыках-упакоўшчыках.
Арцём Цвяцінскі працуе ў складзе мехатрада масласырзавода толькі з верасня мінулага года, і адразу – у лідарах. Яшчэ ў ліпені Арцём Віктаравіч на МТЗ-1523 з “Роланд” першым у вобласці нарыхтаваў у стрэтч-плёнку 2500 тон зялёнай масы. Віншуючы перадавіка, у раёне спадзяваліся, што яго праца, як і дасягненні іншых хлебаробаў рэгіёна, спаўна бу-дзе адзначана на “Дажынках”. Надзеі спраўдзіліся: падчас “Дажынак”, што адбудуцца заўтра ў Браславе, пераможца абласнога спаборніцтва Арцём Цвяцінскі будзе ўзнагароджаны Падзячным пісьмом і грашовай прэміяй. Аднак, як гаворыць сам, матэрыяльная ўзнагарода для яго – не самае галоўнае. Быць першым у вобласці, знайсці прызнанне за добрасумленную працу – гэта вялікі гонар і пашана. А ганарыцца Арцёму Цвяцінскаму ёсць чым: на асабістым рахунку механізатара 5316,6 тоны нарыхтаваных травяных кармоў, а гэта – 8861 рулон!
Вопыту ў Арцёма Цвяцінскага, як і жадання працаваць, хапае: падчас вучобы па спецыяльнасці “тэхнік-механік” адкрыў неабходныя для кіравання сельскагаспадарчай тэхнікай катэгорыі. Шэсць гадоў працаваў інжынерам у сельгаспрадпрыемстве. Восенню ў складзе мехатрада на МТЗ-3522 з “Лемкен” вёў ворыва, на МТЗ-1523 з “Амазон” уносіў угнаенні, затым прасаваў салому – давялося папрацаваць практычна ва ўсіх гаспадарках раёна. Пасля займаўся корманарыхтоўкай. Калі ёсць жаданне, любая работа ладзіцца.
Ксенія ТАМАШЭВІЧ.
Фота аўтара.
