Нягледзячы на няўстойлівае вясенняе надвор’е, сельгасвытворцы выкарыстоўваюць кожную пагодлівую хвіліну, каб выехаць на палеткі.
Некаторыя гаспадаркі прыступілі ўжо да яравой сяўбы, аднак аб масавым выхадзе ў поле гаварыць не даводзіцца. Яравыя зерневыя і зернебабовыя выбарачна сеюць у ААТ “Нурава”, “Прудзінкі”, СП “Каханавічы”. Толькі прыступілі да сяўбы ў ААТ “Шайцерава”, “Антонава-Агра”, СП “Дрысенскі”. Акрамя таго, вядзецца ворыва глебы (гэта работа яшчэ з восені цалкам зроблена ва УВП “Вужыца-Агра”, ААТ “Шайцерава”, СП “Дрысенскі” і “Верхнядзвінскі”), уносяцца арганічныя ўгнаенні.
Больш таго, неабходна своечасова падкарміць азімыя зерневыя і рапс, частку якіх давядзецца перасяваць. Аднак пераўвільготненая глеба, вымачкі не даюць разгарнуцца тэхніцы на поўную магутнасць. І ўсё ж сельгасвытворцы разумеюць: задача дня – сеяць.
— Нам бы яшчэ пару-тройку сонечных дзянькоў, каб пачаць масавую сяўбу, — гаворыць галоўны аграном СП “Каханавічы” Аляксандр Казлоў. – Вада з палёў зыходзіць марудна, нават вывазка арганікі абцяжарана. Хапае і людзей, і тэхнікі, каб сеяць хуткімі тэмпамі. Механізатары ўжо засумавалі па палетках. Зараз перасяваем азімы рапс, вядзем падкормку азімых і ворыва глебы, уносім арганічныя ўгнаенні.
Ксенія КАВАЛЁНАК.
