У Верхнядзвінскім раёне адзначылі Дзень работнікаў сельскай гаспадаркі і перапрацоўчай прамысловасці АПК

Сваё прафесійнае свята адзначылі працаўнікі сельскай гаспадаркі і перапрацоўчай прамысловасці аграпрамысловага комплексу.

Працаўнікоў аграпрама, гасцей і ўсіх удзельнікаў урачыстага мерапрыемства сустракалі ў раённым Цэнтры культуры і народнай творчасці віншаваннямі, музыкай, выставамі, кірмашом рамёстваў. На дэгустацыйных сталах масласырзавода, хлебазавода і райпо быў прадстаўлены шырокі асартымент прадукцыі, свае вырабы дэманстравалі прамысловыя прадпрыемствы.

Галоўным атрыбутам свята стаў, вядома ж, залацісты каравай – пад дружныя апладысменты яго ўручылі на святочнай сцэне старшыні райвыканкама І.І. Марковічу, як сімвал новага ўраджаю. Кіраўнік раёна павіншаваў працаўнікоў аграпрама і ўсіх жыхароў Верхнядзвіншчыны са святам, якое з’яўляецца ў нас агульным. Да працы на зямлі маюць дачыненне ўсе ад мала да вяліка, бо яна з’яўляецца асновай дабрабыту чалавека. І сёлета верхнядзвінцы старанна працавалі, каб забяспечыць харчовую бяспеку грамадства. Сабраны добрыя ўраджаі розных культур, створана надзейная кармавая база, атрыманы намечаныя надоі і прывагі, забяспечана якасная перапрацоўка сельгаспрадукцыі. За гэтымі вынікамі нялёгкая праца многіх людзей, за якую кіраўнік раёна сардэчна падзякаваў работнікам сельскай гаспадаркі і перапрацоўчай прамысловасці АПК, усім, хто клапаціўся аб хлебе на стале.
З віншаваннямі да аграрыяў звярнуліся старшыня раённага Савета дэпутатаў І.Ф. Козел, першы намеснік старшыні, начальнік упраўлення сельскай гаспадаркі і харчавання райвыканкама У.У. Быкаў, начальнік аддзела эканомікі райвыканкама Н.В. Дзямешка, старшыня райкама прафсаюза работнікаў АПК А.У. Зуй. Перадавікам сельгасвытворчасці і перапрацоўчай прамысловасці ўручаны Ганаровыя граматы, Падзякі, дыпломы і прэміі.
Работнікі культуры і самадзейныя артысты раённай сцэны парадавалі гасцей цудоўнымі нумарамі мастацкай творчасці. Адметна, што свае таленты прадэманстравалі і самі сельгасвытворцы, сярод якіх нямала творча адораных людзей. Незвычайным сюрпрызам для ўдзельнікаў свята стаў відэафільм з віншаваннямі ад кіраўнікоў сельгаспрадпрыемстваў і перапрацоўчай прамысловасці і жартоўнымі сюжэтамі з вясковага жыцця.